Adhunika Kannada Sahityada Arambha

ʼಆಧುನಿಕ ಕನ್ನಡ ಸಾಹಿತ್ಯದ ಆರಂಭʼ ರಾಜೇಂದ್ರ ಬಡಿಗೇರ್ ಅವರ ಹೊಸ ಕೃತಿ. ಇದನ್ನು ʼಸಂಗಾತ ಪುಸ್ತಕʼ ಪ್ರಕಟಿಸಿದೆ. ವಿಮರ್ಶಕರಾದ ಕೇಶವ ಶರ್ಮ ಅವರು ಮುನ್ನುಡಿ ಬರೆದಿದ್ದಾರೆ. ಕಿರಣ್ ಮಾಡಾಳು ಮುಖಪುಟ ಮತ್ತು ಶರತ್ ಎಚ್.ಕೆ. ಪುಟ ವಿನ್ಯಾಸ ಮಾಡಿದ್ದಾರೆ.
‘ಆಧುನಿಕ ಕನ್ನಡ ಸಾಹಿತ್ಯದ ಆರಂಭʼ ಕೃತಿ ಎತ್ತುವ ಪ್ರಶ್ನೆಗಳು, ಮಂಡಿಸುವ ವಾದಗಳು ಮಹತ್ವದ್ದಾಗಿವೆ. ಈಗಾಗಲೇ ದಾಖಲಾಗಿರುವ ಸಾಹಿತ್ಯದ ಚರಿತ್ರೆ ಸತ್ಯದ್ದೇ? ಸುಳ್ಳಿನದ್ದೇ? ಎಂದು ಚರ್ಚಿಸುವ ಈ ಕೃತಿ ಬೆರಗುಗೊಳಿಸುವ ಅಪ್ಪಟ ಸತ್ಯಗಳನ್ನು ನಮ್ಮೆದುರಿಗೆ ಹರಡುತ್ತ ಹೋಗುತ್ತದೆ. ಅನ್ಯಾಯದ ಚರಿತ್ರೆಯನ್ನು ದಾಖಲೆಗಳ ಮೂಲಕ ಪರಿಶೀಲಿಸುವ ಈ ಕೃತಿಯ ಧೈರ್ಯ, ನಿಷ್ಠುರತೆ, ಪ್ರಾಮಾಣಿಕತೆ ಅಪರೂಪದ್ದು. 
ಕೆಲವು ಸಾಹಿತಿಗಳನ್ನು ವೈಭವೀಕರಣ ಮಾಡಿದರೆ, ಮತ್ತೆ ಕೆಲ ಸಾಹಿತಿಗಳನ್ನು ಮೂಲೆಗೆ ತಳ್ಳಲಾಗಿದೆ. ಇನ್ನು ಕೆಲವರನ್ನು ಲೆಕ್ಕಕ್ಕೇ ತೆಗೆದುಕೊಳ್ಳಲಾಗಿಲ್ಲ. ಹೀಗಾಗಿ ಕೆಲ ಸಾಹಿತಿಗಳು ಕೇಂದ್ರಕ್ಕೆ ಬಂದರು. ಮತ್ತೆ ಕೆಲವರು ಅಂಚಿಗೆ ತಳ್ಳಲ್ಪಟ್ಟರು. ಇದನ್ನೆಲ್ಲ ದಾಖಲೆಗಳ ಮೂಲಕ ಬಿಚ್ಚಿಡುವ ಈ ಕೃತಿಯನ್ನು ಕನ್ನಡದ ಸಾರಸ್ವತಲೋಕ, ಓದುಗರು ಚರ್ಚಿಸುವಂತಾಗಲಿ.