ಜಾನಪದ ಕತೆಗಳೆಂದರೆ ಅವುಗಳಿಗೆ ಆಯಾ ನೆಲದ ವೈಶಿಷ್ಟ್ಯವಿರುತ್ತದೆ. ಇಲ್ಲಿ ಹೇಳಲಾದ ಕತೆಗಳಿಗೆ ಆಸ್ಟ್ರೇಲಿಯದ ಆದಿವಾಸಿಗಳು ತಮ್ಮ ಊಹೆಗೆ ತಕ್ಕಂತೆ ಹೆಣೆದ ಒಂದು ಕಾಲ್ಪನಿಕ ಆಯಾಮವಿದೆ. ಪ್ರಾಣಿ ಪಕ್ಷಿಗಳ ಮೂಲಕ ಹೇಳಲಾದ ಹಲವು ನೈತಿಕ – ಪ್ರಾಕೃತಿಕ - ಬೌದ್ಧಿಕ ವಿಶೇಷತೆಗಳನ್ನಿಲ್ಲಿ ಕಾಣಬಹುದು. ಪ್ರಾಣಿಗಳ ಕೂಗು, ಅವುಗಳ ಜಾಡನ್ನು ಹಿಡಿದು ಆದಿವಾಸಿಗಳು ಅದಕ್ಕೊಂದು ಕತೆ ಕಟ್ಟಿ ನಾವದನ್ನು ನಂಬುವಂತೆ ಮಾಡಬಲ್ಲರು. ಕತೆಗಳೆಂದರೆ ಯಾರೂ ನಿಯಮ ಮೀರದಂತೆ, ತಪ್ಪು ಮಾಡದಂತೆ ಯಾರನ್ನೂ ನೋಯಿಸದಂತೆ ನೀತಿ ಮಾರ್ಗದಲ್ಲೇ ನಡೆಯುವಂತೆ ಸಂದೇಶವೊಂದು ಅಲ್ಲಿ ಇರುತ್ತದೆ. ಇಲ್ಲಿನ ಪಾತ್ರಗಳೆಲ್ಲ ಪ್ರಾಣಿ-ಪಕ್ಷಿಗಳು. ಮನುಷ್ಯರನ್ನು ಅವರು ಕರಿ ಜನ ಎನ್ನುತ್ತಾರೆ. ಆಸ್ಟ್ರೇಲಿಯದ ಪ್ರಾಣಿ ಪಕ್ಷಿಗಳ ವಿವರಗಳೆಲ್ಲಾ ಈ ಕತೆಗಳ ಮೂಲಕ ನಮಗೆ ಪರಿಚಯವಾಗುತ್ತದೆ. ಪುಸ್ತಕದ ಕೊನೆಯಲ್ಲಿ ಅಲ್ಲಿನ ಪ್ರಾಣಿ-ಪಕ್ಷಿಗಳ ಹೆಸರು ವಿವರಗಳನ್ನು ಚಿತ್ರಗಳ ಸಹಿತ ನೀಡಿರುವುದರಿಂದ ಇಡೀ ಜೀವಿ ವೈವಿಧ್ಯದ ಪರಿಚಯವೂ ನಮಗಾಗುತ್ತದೆ. ಅಪರೂಪದ ಪುಸ್ತಕವಿದು.