With time, I...

ಕನ್ನಡ ಮತ್ತು ತೆಲುಗು ಭಾಷೆಗಳು ದ್ರಾವಿಡ ಭಾಷಾ ಕುಟುಂಬದ ಚಿನ್ನದ ಗಣಿಗಳು. ಈ ಎರಡೂ ಭಾಷೆಗಳಲ್ಲಿ ಅಪಾರವಾದ ಸಂಪತ್ತಿದೆ. ಆ ಸಂಪತ್ತನ್ನು ಬಳಸಿಕೊಂಡು ಹಲವಾರು ಲೇಖಕರು, ಕಲಾವಿದರು, ಸಾಂಸ್ಕೃತಿಕ ನಾಯಕರು, ರಾಜಕಾರಣಿಗಳು ಮಾತ್ರವಲ್ಲದೆ, ಸಾಮಾನ್ಯ ಜನರೂ ಕೂಡಾ ಬೆಳೆದಿದ್ದಾರೆ, ಭಾಷೆಯನ್ನು ತಾಯಿಯಂತೆ, ದೇವತೆಯಂತೆ ಪ್ರೀತಿಸಿ, ಅದರ ಮಮಕಾರದಲ್ಲಿ ತೃಪ್ತಿ ಹೊಂದಿದ್ದಾರೆ. ಇದೇ ಕಾರಣದಿಂದ ಕುವೆಂಪು, ಡಾ. ರಾಜ್‌ಕುಮಾರ್, ಶ್ರೀಶ್ರೀ, ಎನ್ಟಿಆರ್, ನಾಗೇಶ್ವರರಾವ್ ತರಹದ ಕವಿ-ಕಲಾವಿದರು ಆಯಾ ಭಾಷಾ ವೈವಿಧ್ಯವನ್ನು ಜನಸಾಮಾನ್ಯರ ಮನಸ್ಸಿಗೆ ಇಳಿಸಿದ್ದಾರೆ.

ಈ ಎರಡೂ ಭಾಷೆಗಳು ಸಹೋದರ ಭಾಷೆಗಳೇ ಆದರೂ, ಎರಡಕ್ಕೂ ಅವುಗಳದೇ ಆದ ವಿಶಿಷ್ಟತೆಯಿದೆ, ವೈವಿಧ್ಯತೆಯಿದೆ. ಇಂತಹ ವೈವಿಧ್ಯತೆಯ ಕಾರಣಕ್ಕಾಗಿ ವಿವಿಧತೆಯಲ್ಲಿ ಏಕತೆ ಸಾಧಿಸಲು ಸಾಧ್ಯವಾಗಿದೆ. ಇಂತಹ ಏಕತೆಯನ್ನು ಸಾಧಿಸಲು ಪರಸ್ಪರ ಕೊಡುಕೊಳ್ಳುವಿಕೆಯೇ ಕಾರಣವಾಗಿದೆ. ತೆಲುಗಿನ ಪದ್ಯಗಳನ್ನೋ, ಬರಹಗಳನ್ನೋ ಕನ್ನಡಕ್ಕೆ ಭಾಷಾಂತರಿಸುವುದು, ಕನ್ನಡದ ಬರಹಗಳನ್ನು ತೆಲುಗಿಗೆ ಭಾವಾಂತರಿಸುವುದರ ಪರಿಣಾಮವಾಗಿ ಎರಡೂ ಭಾಷೆಗಳು ನಮ್ಮವೇ ಎಂಬುವಷ್ಟು ಆಪ್ತತೆಗೆ ಕಾರಣವಾಗಿದೆ.

ಅಗ್ರಹಾರಂ ನಾಗಶೇಷು ಅವರ ಕಾಡುವ ಪದ್ಯಗಳನ್ನು ಅಷ್ಟೇ ಸದೃಢವಾಗಿ ಕನ್ನಡೀಕರಿಸುವುದರ ಮೂಲಕ ಚಿನ್ನುಪ್ರಕಾಶ್ ಶ್ರೀರಾಮನಹಳ್ಳಿ ಅವರು ತೆಲುಗು ಕನ್ನಡಿಗರಿಗೆ ಆಪ್ತವಾಗುವಂತೆ ಮಾಡಿದ್ದಾರೆ. ಈ ಹಿಂದೆ ಅನೇಕ ಕವಿಗಳು ತೆಲುಗಿನ ವಿಪ್ಲವ ಪದ್ಯಗಳನ್ನು, ಕ್ರಾಂತಿಕಾರಿ ಕೃತಿಗಳನ್ನು ಕನ್ನಡಕ್ಕೆ ತಂದಿದ್ದರೂ, ಚಿನ್ನುಪ್ರಕಾಶ್ ಅವರ “ಕಾಲದ ಜೊತೆಗೆ ನಾನೂ..." ಎಂಬ ಕೃತಿಯು ತನ್ನ ವಿಶಿಷ್ಟ ಲಯ, ವಿನ್ಯಾಸದಿಂದ ಓದುಗರಿಗೆ ಬಹಳಷ್ಟು ಕಾಲ ಕಾಡಲಿದೆ. ಸುಮ್ಮನೆ ಭಾವಾಂತರವನ್ನೋ, ಭಾಷಾಂತರವನ್ನೋ ಚಿನ್ನುಪ್ರಕಾಶ್ ಅವರು ಮಾಡದೆ, ಓದುಗರ ಹೃದಯಕ್ಕೆ ಹತ್ತಿರವಾಗುವ ರೀತಿಯಲ್ಲಿ ತೆಲುಗಿನ ಪದ್ಯಗಳನ್ನು ಕನ್ನಡದ್ದೇ ಅನಿಸುವಷ್ಟು ಪರಿಣಾಮಕಾರಿಯಾಗಿ ಕಟ್ಟಿಕೊಟ್ಟಿದ್ದಾರೆ. ಇಂತಹ ಮಹತ್ತರವಾದ ಪದ್ಯಗಳನ್ನು ಬರೆದ ಮೂಲ ಕವಿ ಮತ್ತು ಅವುಗಳನ್ನು ಕನ್ನಡಕ್ಕೆ ಒದಗಿಸಿಕೊಟ್ಟ ಅನುವಾದಕ ಇಬ್ಬರೂ ಅಭಿನಂದನೆಗೆ ಅರ್ಹರು.

-ವಿ.ಆರ್.ಕಾರ್ಪೆಂಟರ್