ಲೋಹಿಯಾ (Lohia) – ಓಂಕಾರ್ ಶರದ್ | Onkar Sharad (ಅನುವಾದ: ಹಸನ್ ನಯೀಂ ಸುರಕೋಡ)

ಭಾರತೀಯ ರಾಜಕೀಯ ಇತಿಹಾಸದ ಅತ್ಯಂತ ಪ್ರಖರ ಪ್ರತಿಚಿಂತಕ, ಧೀಮಂತ ಸಮಾಜವಾದಿ ನಾಯಕ ಡಾ. ರಾಮಮನೋಹರ ಲೋಹಿಯಾ ಅವರ ಬದುಕು ಮತ್ತು ಹೋರಾಟವನ್ನು ಅನಾವರಣಗೊಳಿಸುವ ಕನ್ನಡದ ಮೊದಲ ಬೃಹತ್ ಸಮಗ್ರ ಜೀವನ ಚರಿತ್ರೆ.

ಕರ್ನಾಟಕದಲ್ಲಿ ಲೋಹಿಯಾವಾದದ ಇತಿಹಾಸಕ್ಕೆ ದಶಕಗಳ ಸುದೀರ್ಘ ಇತಿಹಾಸವಿದೆ ಹಾಗೂ ಇಡೀ ದೇಶದಲ್ಲೇ ಲೋಹಿಯಾ ಅವರಿಗೆ ನಮ್ಮ ರಾಜ್ಯದಲ್ಲಿ ಅತ್ಯಂತ ದೊಡ್ಡ ಅನುಯಾಯಿಗಳ ಬಳಗವಿದೆ. ಆದಾಗ್ಯೂ, ಈ ಮಹಾನ್ ನಾಯಕನ ಸಮಗ್ರ ಜೀವನ ಚರಿತ್ರೆಯೊಂದು ಕನ್ನಡದಲ್ಲಿ ಲಭ್ಯವಿರಲಿಲ್ಲ. ಆ ಕೊರತೆಯನ್ನು ನೀಗಿಸಲು ಹಿಂದಿಯ ಖ್ಯಾತ ಲೇಖಕ ಓಂಕಾರ್ ಶರದ್ ಅವರು ಬರೆದ ಅತ್ಯಂತ ಯಶಸ್ವಿ ಕೃತಿಯನ್ನು, ರಾಜ್ಯ ಸರ್ಕಾರದ ಲೋಹಿಯಾ ಸಮಗ್ರ ಕೃತಿಗಳ ಪ್ರಕಟಣಾ ಸಮಿತಿಯ ಸದಸ್ಯರಾದ ಹಸನ್ ನಯೀಂ ಸುರಕೋಡ ಅವರು ಅತ್ಯಂತ ಪ್ರೌಢವಾಗಿ ಕನ್ನಡಕ್ಕೆ ಅನುವಾದಿಸಿದ್ದಾರೆ. ಪ್ರಸಿದ್ಧ ‘ಲೋಹಿಯಾ ಪ್ರಕಾಶನ’ದ ಮೂಲಕ ಇದು ಬೆಳಕು ಕಂಡಿದೆ.

ಬಾಲ್ಯದಿಂದಲೇ ಅಪ್ರತಿಮ ಸ್ವಾತಂತ್ರ್ಯ ಪ್ರವೃತ್ತಿ ಮತ್ತು ಹಟಮಾರಿ ಸ್ವಭಾವ ಹೊಂದಿದ್ದ ಲೋಹಿಯಾ ಅವರ ಜೀವನದ ಪಯಣ ಅತ್ಯಂತ ರೋಮಾಂಚನಕಾರಿಯಾದುದು. ಬಿ.ಎ. ಮುಗಿಸಿ ಉನ್ನತ ವ್ಯಾಸಂಗಕ್ಕಾಗಿ ಜರ್ಮನಿಗೆ ತೆರಳಿದಾಗ ಅಲ್ಲಿ ಹಿಟ್ಲರ್ನ ಫ್ಯಾಸಿಸಂನ ಅಟ್ಟಹಾಸವನ್ನು ಕಣ್ಣಾರೆ ಕಂಡು ದಂಗಾಗುವ ಲೋಹಿಯಾ, ಮರಳಿ ಭಾರತಕ್ಕೆ ಬಂದಾಗ ಬ್ರಿಟಿಷರ ಬರ್ಬರತೆಗೆ ಮುಖಾಮುಖಿಯಾಗುತ್ತಾರೆ. ಲಾಹೋರ್ ಕಾರಾಗೃಹದಲ್ಲಿ ಅವರು ಅನುಭವಿಸಿದ ಅಮಾನುಷ ಹಿಂಸೆ ಮತ್ತು ಅವರ ಒಟ್ಟು ಹೋರಾಟಗಳು ಅವರ ಇಡೀ ಜೀವನದ ದೃಷ್ಟಿಕೋನವನ್ನು ಹೇಗೆ ರೂಪಿಸಿದವು ಎಂಬುದನ್ನು ಈ ಕೃತಿ ಎಳೆಎಳೆಯಾಗಿ ಬಿಚ್ಚಿಡುತ್ತದೆ.

ವಿಪರ್ಯಾಸವೆಂದರೆ, ಸ್ವತಂತ್ರ ಭಾರತದಲ್ಲೂ ಸಹ ಅವರು ವ್ಯಕ್ತಿ ಸ್ವಾತಂತ್ರ್ಯಕ್ಕಾಗಿ ಮತ್ತು ಪ್ರತಿಭಟನೆಯ ಹಕ್ಕಿಗಾಗಿ ಆಡಳಿತ ವ್ಯವಸ್ಥೆಯ ವಿರುದ್ಧ ನಿರಂತರ ಹೋರಾಟ ಮುಂದುವರಿಸಬೇಕಾಗಿ ಬಂದ ಕಟು ವಾಸ್ತವ ಇಲ್ಲಿದೆ.